Chorale Agape yo mu Itorero Presbyterienne-EPR Paroisse ya Kiyovu igiye gukora ku nshuro ya kabiri igitaramo ngarukamwaka cyiswe “Dushime Uwiteka Live Concert – Season 2”, kizaba ku Cyumweru tariki ya 18 Ukwakira 2026, muri Kigali Serena Hotel.
Iki gitaramo kizatangira saa 2:00 PM, kandi kwinjira bizaba ari ubuntu. Cyateguwe hagamijwe guhuriza hamwe abakristo n’abakunzi b’umuziki wa Gospel mu mwanya mwiza wo kuramya, guhimbaza no gushimira Imana, hashingiwe ku murongo wo muri Zaburi 143:5–6.
Chorale Agape izifatanya n’abatumirwa batandukanye barimo Chorale Jehovah Jireh yo muri ADEPR, Believers Worship Team na Chorale Bethel byo muri EPR, ndetse n’abahanzi Papi Clever na Dorcas. Rev. Dr. Antoine Rutayisire niwe uzagabura ijambo ry’Imana ku bazitabira iki gitaramo.
Chorale Agape yashinzwe ku wa 1 Kamena 1997, ikaba igizwe n’abaririmbyi bagera kuri 60. Mu 2027 izizihiza imyaka 30 imaze ikora umurimo w’ivugabutumwa binyuze mu ndirimbo n’ibindi bikorwa bagezeho.
Abategura iki gitaramo bavuga ko “Dushime Uwiteka Live Concert” ari igikorwa bifuza ko kiba ngarukamwaka, kikazajya gihuriza hamwe abantu b’ingeri zitandukanye mu mwanya wo kuramya no kuyihimbaza, ndetse no kuyishimira kubyo yakoze ku gihugu no ku buzima bw’abantu.
Chorale Agape irahamagarira abakristo, amatorero, imiryango, urubyiruko n’abakunzi ba Gospel kwitabira iki gitaramo kizaberamo guhembuka kudasanzwe.
