Pasiteri Son Hyun-bo wo muri Koreya y’Epfo, uzwi mu bikorwa bya gikirisitu bya Save Korea, yahuye na Perezida wa Amerika Donald Trump muri White House mu mpera z’icyumweru gishize.
Son yari yajyanye n’umuryango we muri Amerika, aho yanasuye White House Faith Office. Umuhungu we yavuze ko se yari amaze iminsi 145 muri gereza atarahamijwe n’urukiko, ashimangira ko yafunzwe azira gukomeza kwamamaza inyigisho za Bibiliya.
Pasiteri Son kandi azwiho kuyobora ibikorwa byo kwamagana ibyemezo bya politiki muri Koreya y’Epfo, no kugaragaza impungenge ku mategeko amwe avuga ko ashobora kugira ingaruka ku matorero n’ubwisanzure bw’amadini.
Yigeze gukatirwa igifungo cy’amezi atandatu kubera ibyaha by’amatora, ariko icyo gifungo gisubikwa umwaka umwe. Mu gihe yari afunzwe, yavuze ko abahagarariye Amerika bamusuye inshuro nyinshi ndetse ko hari abapasiteri b’Abanyamerika bagera ku 10,000 basabye ko arekurwa.
