Umukirigitananga Esther Niyifasha yatangiye umushinga wo kurushinga na
David Giraneza utuye muri Suède.
Kuri iki Cyumweru, tariki ya 14 Ukuboza 2025 ni bwo Niyifasha na Giraneza bwrekanywe imbere y’abakirisitu mu Itorero ADEPR asengeramo.
Ni igikorwa cyabereye muri ADEPR Ntora mu Ishami ry’abasenga bakoresheje indimi z’amahanga, bateranira mu nyubako ya Dove Hotel ku Gisozi.
Niyifasha usanzwe aririmba mu itsinda riramya rikanahimbaza Imana mu rusengero, Ntora Worship Team, yishimiwe by’ikirenga ubwo yahamagarwaga nk’ugiye gutangiza umushinga wo kubaka urugo.
Yakirijwe indabo nyinshi nk’ikimenyetso gishimangira ko abamugaragiye bishimiye intambwe yatewe.
Muri ADEPR n’andi matorero ya gikirisitu babanza kwerekana abitegura kurushinga kugira ngo abakirisitu babatangire ubuhamya mbere yo gukomeza urugendo rwabo.
Abari mu materaniro babihamishije ibiganza byabo ko ubuhamya bwa Niyifasha butaratokorwa ndetse yirinze mu bukumi bwe, bityo bahaye umugisha urugendo rwe n’umukunzi we.
Niyifasha na Giraneza David bakundanye bucece ndetse urukundo rwabo ntirwigeze rusandarira mu itangazamakuru cyane ko uyu mukobwa asanzwe avuga amagambo abaze kandi akamenya gucisha make.
Nta makuru menshi aramenyekana y’igihe ubukwe bw’aba bombi buzabera.
Esther Niyifasha amaze kubaka izina nk’umwe mu bagore bihebeye inanga ndetse azwi cyane mu ndirimbo zitandukanye zirimo izihimbaza Imana, izitaka umuco Nyarwanda ndetse n’ibikorwa birimo nko gusohora abageni.
Niyifasha azwi mu ndirimbo zirimo ’Urashoboye’, ’Tumurikire’, ’Laurrete’ ya Kamaliza yasubiyemo n’izindi.
Uyu muhanzikazi ni mushiki w’Umukirigitananga Deo Munyakazi n’Umuhanzi Albert Niyonsaba na we uzwi mu muziki uhimbaza Imana, akaba umuhererezi mu muryango wabo.
Niyifasha Esther yacuranze mu bitaramo byinshi bikomeye birimo African Exchange (CAX) mu Iserukiramuco rya Rabagirana, Kölbingen Festival yabereye mu Budage mu 2024 ndetse yanakoranye n’abahanzi bazwi nka John Legend.
