Papa Leo XIV yanditse amateka yo kuba Umushumba wa Kiliziya Gatolika ku Isi wa kane winjiye mu musigiti. Ku wa 29 Ugushyingo 2025 ni bwo Papa Leo yasuye Sultan Ahmed Mosque izwi nka Blue Mosque iri muri Istanbul muri Türkiye.
Muri iki gihugu ni ho Papa Leo XIV yagiriye uruzinduko rw’akazi, rwabaye urwe rwa mbere yakoreye hanze y’u Butaliyani kuva atorewe kuyobora iri dini rifite abayoboke basaga miliyari 1.406.
Papa Leo XIV yakiriwe na Perezida wa Türkiye, Recep Tayyip Erdogan, bagirana n’ibiganiro byihariye byagarutse ku ngingo zitandukanye zirimo n’izerekeye umubano w’iki gihugu na Kiliziya Gatolika.
Mu bindi bikorwa yakoze, Papa Leo XIV yasuye Umusigiti wa Blue Mosque, ahita aba Umushumba Mukuru wa Kiliziya Gatolika wa kane winjiye mu musigiti kuva iri dini ryabaho.
Vatican yanditse ko uru rugendo rwafashwe nk’ikimenyetso cy’ubwubahane n’ubuvandimwe hagati y’Abakirisitu n’Abayisilamu.
Akigera ku musigiti, Papa Leo XIV yakuyemo inkweto mu rwego rwo kubaha umuco w’Abayisilamu, maze amara mu musigiti hafi iminota 20 asangizwa amateka n’ibisobanuro by’amasengesho akorwa.
Nubwo abapapa bamubanjirije bose bafashe akanya ko gusenga, Papa Leo XIV we yagumye atuje atabanje gusengera mu musigiti, avuga ko urugendo rwe rwari urw’ubusesenguzi no kubahana hagati y’amadini.
Ubwo yaganiraga n’abayobozi bo muri Islam bamwakiriye, harimo na Mufti wa Istanbul, yabashimiye uburyo iri dini ryubaka amahoro igihe yemereraga amahanga kubana mu bworoherane.
Mu butumwa bwe, Papa Leo XIV yagize ati “Uru ruzinduko ni intambwe nshya mu gushimangira ko amahoro hagati y’amadini akomoka ku kubahana, atari amasengesho n’imigenzo.”
Uru ruzinduko rwashyize Papa Leo XIV mu rwego rumwe na bagenzi be batatu bamubanjirije banditse amateka mu mubano w’Abayisilamu n’abakirisitu. Ni Papa Yohani Pawulo II winjiye mu musigiti bwa mbere mu 2001, asura Umayyad Mosque i Damascus mbere y’uko Papa Benedigito XVI yasuye Blue Mosque mu 2006.
Mu 2014, Papa Francis na we yatembereye muri uwo musigiti, ndetse mu kiganiro n’abanyamakuru yavuze ko ari igisobanuro cy’amahoro adasanzwe hagati y’abizera b’amadini abiri akomeye.
Uruzinduko rwa Papa Leo XIV rufatwa nk’urukomeza umuyoboro w’ubwiyunge wubatswe n’abashumba ba Kiliziya Gatolika bamubanjirije.
Nyuma ya Istanbul, Papa Leo XIV yakomereje uruzinduko rwe muri Liban, aho yahuye n’abayobozi b’amadini atandukanye, harimo Abakirisitu, Abayisilamu ndetse n’abayobozi b’amatorero gakondo atandukanye. Yahamije ko Uburasirazuba bwo Hagati ari indorerwamo igaragaza uko amahoro hagati y’amoko n’amadini ashobora kubakwa binyuze mu biganiro bihoraho.
