Apôtre Dr. Paul Gitwaza, Umushumba Mukuru wa Zion Temple Celebration Center akaba n’uwashinze Authentic Word Ministries, yageze mu Burundi aho yagiye kwifatanya n’Itorero Zion Temple Burundi mu bikorwa byo kwizihiza imyaka 25 rimaze rishinzwe.
Urwo ruzinduko ruhuriranye n’igiterane cy’ivugabutumwa “Haguruka Ugende”, giteganyijwe kuba kuva ku wa 20 kugeza ku wa 23 Kanama 2026. Iki giterane kigamije gukangurira Abakristo gukura mu kwizera, guhaguruka bagakora ndetse no gushyira mu bikorwa umuhamagaro Imana yabahaye.
Dr. Paul Gitwaza yageze i Bujumbura anyuze ku Kibuga Mpuzamahanga cya Melchior Ndadaye, nk’uko yabitangaje ku rukuta rwe rwa Instagram. Yasabye Abakristo bo mu Burundi, by’umwihariko abo mu mujyi wa Bujumbura, kuzitabira iki giterane ari benshi, bakifatanya mu kuramya no mu kwakira ubutumwa bw’Ijambo ry’Imana.
Zion Temple imaze imyaka 25
Zion Temple Celebration Center yatangijwe na Apôtre Dr. Paul Gitwaza ku wa 11 Nyakanga 1999, ubwo abantu bagera kuri 120 batangiraga uyu murimo.
Mu myaka 25 ishize, uyu muryango w’amatorero wakomeje kwaguka, ugera mu bice bitandukanye ndetse ukomeza ibikorwa by’ivugabutumwa n’inyigisho za Bibiliya.
Mu Burundi, Zion Temple iri mu bikorwa byo kwizihiza iyi sabukuru y’imyaka 25, aho igiterane “Haguruka Ugende” kiri mu bikorwa byateguwe muri urwo rwego.
Urwo ruzinduko rwa Dr. Paul Gitwaza mu Burundi ruje nyuma y’uko yitabiriye igiterane mpuzamatorero Rwanda Shima Imana, cyabereye kuri Stade Amahoro i Kigali ku Cyumweru, tariki ya 16 Kanama 2026.
Ubu akaba yerekeje mu Burundi, aho azifatanya n’Abakristo ba Zion Temple Burundi mu minsi ine y’ivugabutumwa, amasengesho, kuramya no guhimbaza Imana mu rwego rwo kwizihiza imyaka 25 y’itorero.
Igiterane “Haguruka Ugende” cyitezweho kuba umwanya wo gukomeza ubutumwa bwo gukangurira Abakristo kugira ukwizera no kudaheranwa n’ibibazo, ahubwo bagahaguruka bagakora ibyo bahamagariwe.
