Paramjit, umugore w’imyaka 44 wo mu Buhinde, yibarutse impanga z’abakobwa nyuma y’imyaka 13 ahanganye n’ibibazo byo kubura urubyaro, aho yatakaje inda 20, zirimo n’impanga ze za mbere yapfushije mu 2018.
Uyu mugore n’umugabo we, Naminder, bari baragerageje uburyo butandukanye bwo kubona umwana, harimo no gusama hifashishijwe ikoranabuhanga rya IVF, ariko bakomeza guhura n’imbogamizi zatumaga atabasha kubyara.
Nyuma yo kubura impanga ze za mbere, Paramjit yavuze ko yagize agahinda gakomeye, kakagira n’ingaruka ku mubano we n’umugabo we. Yavuze ko yumvaga ameze nk’umuntu wapfuye ariko ugikomeza kugenda, agerageza kubaho nubwo umutima we wari warasandaye.
Mu 2022, ubwo yari mu Buhinde, yasuye ahantu hatagatifu hasengerwa, harimo Hazoor Sahib na Amritsar, asenga asaba Imana ko yamufasha kubona umwana. Yiyemeje ko naramuka abaye umubyeyi, azagaruka aho hantu gushimira Imana.
Nyuma y’ukwezi kumwe, Paramjit yamenye ko atwite. Ibyishimo byiyongereye ubwo abaganga bamubwiraga ko atwite impanga, nubwo byamuhangayikishije kubera amateka yo kubura abana yari afite. Yabwiye umugabo we ko yumvaga Imana yongeye kumuha impanga ze.
Inda ye yakurikiranwe by’umwihariko n’abaganga, maze amaze ibyumweru 36 abyara impanga z’abakobwa, Avnoor na Ajooni, abazwe.
Paramjit yavuze ko gufata abana be bwa mbere byari umwe mu myanya y’agaciro gakomeye mu buzima bwe, nyuma y’imyaka myinshi y’ishavu, gutakaza inda n’urugendo rutoroshye rwo gushaka umwana.
Avnoor na Ajooni ubu bari hafi kuzuza imyaka itatu. Paramjit yasangije ubunararibonye bwe agamije gutera imbaraga imiryango ihura n’ibibazo byo kubura urubyaro no gutakaza inda, ashimangira ko nubwo urugendo rushobora kuba rurerure kandi rugoye, abantu bakwiye gukomeza kugira ibyiringiro.
