Umuhanzi w’indirimbo zo kuramya no guhimbaza Imana Israel Mbonyi yasubitse igitaramo “Icyambu Live Concert” yari ategerejwemo n’Abanya-Rubavu, habura iminsi mbarwa ngo kibe.
Itangazo ryashyizwe hanze n’abafasha Israel Mbonyi gutegura ibitaramo by’Icyambu live concert, ryemeza ko igitaramo cyari giteganyijwe kubera muri Stade Umuganda mu Karere ka Rubavu, tariki ya 1 Mutarama 2026, cyasubitswe, kikaba cyimuriwe ku yindi tariki izatangazwa mu minsi iri imbere.
Muri iri tangazo abategura igitaramo bagaragaje ko ari icyemezo cyafashwe hashingiwe ku busabe bw’abantu batandukanye bifuzaga kucyitabira ndetse no kuri gahunda y’ibitaramo bya Icyambu Israel, Mbonyi ategenya gukora bizenguruka mu gihugu hose.
Rigira riti “Bushingiye ku busabe bwinshi bw’abantu batandukanye bateganyaga kwitabira igitaramo cya Icyambu i Rubavu ndetse na gahunda y’ibitaramo Israel Mbonyi ateganya mu gihugu hose, turabamenyesha ko igitaramo cya Rubavu cyari giteganyijwe ku ya 1 Mutarama 2026 cyimuriwe ku yindi tariki. Itariki n’ukwezi bizatangazwa mu minsi ya vuba.”
Ku birebana n’abamaze kugura amatike, itangazo rivuga ko abategura igitaramo bazavugisha buri umwe bagahabwa amahitamo abiri arimo kuyakoresha mu bindi bitaramo bya Icyambu biri imbere, cyangwa gusaba gusubizwa amafaranga yabo.
Abategura igitaramo basabye abakunzi ba Israel Mbonyi kwihangana ku bw’impinduka zabaye mu gitaramo “Icyambu Live Concert” i Rubavu no gukomeza kumushyigikira mu bitaramo ateganya.
Iki gitaramo gisubitswe Nyuma yaho Israel Mbonyi kuri Noheli, tariki ya 24 Ukuboza 2025, yari yataramiye abakunzi be ndetse n’abakunda indirimbo zo kuramya no guhimbaza Imana mu gitaramo ngarukamwaka yise “Icyambu4 Live Concert” cyabereye muri BK Arena.
Umwanditsi: Uwamariya Marie Reine
